2009-11-18 17:21

Складанасць і шматаблічча праблемаў, што напаткалі чалавецтва на парозе ХХI стагоддзя, сталіся новым выклікам для адукатараў і адукацыйных устаноў. Якой павінна быць адукацыя, каб яна садзейнічала разуменню грамадзянамі ўзаемазалежнасці паміж навакольным асяроддзем, эканомікай і сацыяльнай сістэмай? Як забяспечыць удзельнікаў

навучання не толькі неабходнымі ведамі, але і спрыяць асэнсаванню і засваенню шэрагу новых каштоўнасцяў? Як уключыць у адукацыйны працэс не толькі дзяцей і моладзь, але і дарослых? Праз якія формы наблізіць навучанне да штодзённых клопатаў і патрэбаў асобы і мясцовых супольнасцяў? Гэтыя і іншыя пытанні абмяркоўваюцца сёння на міжнародных і нацыянальных сустрэчах адукатараў па выпрацоўцы новых падыходаў да асветніцкай дзейнасці на карысць устойлівага развіцця.

Менавіта роздум над падобнымі пытаннямі падштурхнуў ГА “Фонд імя Льва Сапегі” да распрацоўкі праекта "Адукацыя і ўдзел — унёсак ва ўстойлівае развіццё", які быў здзейснены ў канцы 2003 — першай палове 2004 гг. у супрацоўніцтве з экспертамі ГА “Экадом” і нямецкімі партнёрамі — Інстытутам міжнароднага супрацоўніцтва пры Нямецкай Асацыяцыі народных вышэйшых школ (Бонн) і Народнай вышэйшай школай Рэген (Баварыя).

Праект быў скіраваны на падтрымку асветніцкіх ініцыятыў у малых населеных пунктах Беларусі і выпрацоўку праекта канцэпцыі Клубаў устойлівага развіцця як формы асветы і актывізацыі насельніцтва. Пад час праекта грамадскія актывісты і мультыплікатары з Фаніпаля, Івянца і вёскі Пагост Салігорскага раёна мелі магчымасць атрымаць дадатковыя веды аб Канцэпцыі ўстойлівага развіцця, формах і спосабах удзелу насельніцтва ў прыняцці рашэнняў (згодна з Законам РБ аб мясцовым кіраванні і самакіраванні), формах і метадах нефармальнай адукацыі дарослых і г.д. Значнымі кампанентамі праекта сталіся семінар па распрацоўцы накірункаў дзейнасці мясцовых ініцыятыў і праекта Канцэпцыі клубаў, а таксама знаёмства з нямецкай сістэмай адукацыі дарослых пад час навучальнага візіту ў Баварыю. Менавіта апошняй падзеі і прысвечаны дадзены артыкул.

Публикация с сайта: http://adukatar.net