З уласнага досведу рэалізацыі доўгатэрміновага навучальнага праекта “Школа маладога журналіста”

Адшумеў Фэст моладзевай журналістыкі “Твой стыль”, які ладзіла да 10-гадовага юбілею наша арганізацыя ў партнёрстве з ГА “Беларуская асацыяцыя журналістаў”. У праграме было шмат цікавага і незвычайнага: прэзентацыі вэб-рэсурсаў, моладзевых выданняў, майстар-класы, конкурсы і ўзнагароды, выпускны ШМЖ-10, сустрэча выпускнікоў розных набораў, прэзентацыя “Каталога лепшых выпускнікоў і выкладчыкаў праекта”, канцэрты, шоу “Венецыянскія згадкі” і, канешне, шмат эмоцый. Кожны раз, калі “выпускаем” чарговы набор, становіцца адначасова і радасна, і сумна. Радасна, што мы змаглі дайсці да фіналу, змаглі шмат чаму навучыцца і шмат чаго перажыць разам. А сумна таму, што прыходзіцца развітвацца з добрай камандай і добрай сяброўскай атмасферай, якая склалася пад час навучання.